ياغريب اشلون تغمض عينك ومتشوف ناسك
اشلون تمشي بين غربة اشلون كلي اتشيل راسك
ابلاية أم ابلاية كاع .
الجدم فاس
وكاعك اتحن وتون لشفاف فاسك
الكاع أم..
وجانت أتحضنك اذا مر الشته والبرد جاسك
وهسه تسألني عليك ؟
اشلون نام؟
اوين نام؟
ومنهو اليدثرة اذا يشمر غطاه ؟
ومنهو اليسكته اذا فز من منامة
وطيف خوف بساعة متأخرة لفاه
بس . تعال؟
تعبت عيون الشوارع
من كثر ما جانت الجيتك تباوع
وتذكر الشارع البي انته ربيت
الخلصت عمرك بحضنه ومادريت
سمع بيك انته أجيت
والله شارعكم حنين
أي حنين
ركض كبل اهلك يهلل
وصعد فوك أعلى عمارة
أعلى بناية
وحط رصيفة على عيونه
الجيتك رايد يباوع
وصلّت الوادم جماعة ورفعت جفوف الدعاء
ومدت من عيونهه
بسم الرجاء
وجان يشبه جف حزين العوز كل عمره خذاه
وطلبوا من الباري زخه أتمر عليهم
وتروي كيض افراكهم لمن تجيهم
زحمة والله اعليك مو شانك يبو الغيره خلية اترد اديهم
يا ابن ذي قار بسم امك اصيحك مو اعيرك
لا أذكرك
وارد احلفك بالشهامة؟ بالمضيف؟ أرد أسأل؟
هم تمر ساعات بالغربة وتحن لعيون ابوك
العراق المحني ظهره على افراكك. هو ابوك
عيون ابوك
الجرن من هامه لعد جدم الكصب
جروح جانن مو عيون
وفركتك نار وحنين الاب حطب
تدري انته بحال ابوك؟
الجان يسكت لو حجه احجايه السلف
أخلاف عينك؟
صار يسكت من يمر طاري الشرف
وتدري انته عكال ابوك ؟
اخلاف عينك !!
ممشى لنعال السرف
***************************
الإثنين أكتوبر 13, 2008 2:46 pm
